Donald Trump stevndur at svara spurningum um álopið á Kongressina

Fyrrverandi amerikanski forsetin, Donald Trump, varð í kvøld stevndur av eini einmæltari kongress kanningarnevnd at møta hjá nevndini at svara spurningum í sambandi við álopið á amerikonsku kongressina 6. januar 2021.

Hetta  er bara hent nakrar fáar ferðir í amerikanskari søgu áður. Avgerðin at stevna Trump var tað seinasta, sum hendi  undir  hoyringini í kvøld. Nú er so upp til Donald Trump, um hann ynskir at møta nevndini. Hann kann ikki tvingast til tað.

Ynskir hann ikki at møta eins og meira enn 30 høgstandandi embætismenn frá hansara tíð í Hvítu Húsunum hava gjørt, so hevur kanningarnevndin møguleika at fáa Umboðsmannatingið at stevna hann at møta har at svara spurningum. Men hetta kann ikki henda fyrr enn eftir miðvalini í november og eftir at nýtt umboðsmannating hevur tikið við fyrst í januar. Og tá er møguleiki fyri, at republikanski flokkurin og Trump hava meirilutin og tá rætt og slætt steðga øllum framhaldandi kanningum.  Enn er púra óvist, hvør fer at vinna tað valið.

Trump kann eisini velja at møta í kanningarnevndini og brúka hetta høvið til at reinsa seg sjálvan og til at skapa sær og republikanska flokkinum umrøðu.