Alda Nielsdóttir
Fyrrverandi amerikanski forsetin og núverandi republikanska forsetavalevnið Donald Trump finst at demokratiska flokkinum, eftir at fleiri demokratar seinastu tíðina hava heitt á Joe Biden forseta um at taka seg úr forsetavalstríðnum.
Hetta vísir, at flokkurin als ikki er demokratiskur, segði Trump á veljarafundi í statinum Michigan í nátt okkara tíð, tann fyrsti hjá Trump, síðan hann var fyri morðroynd á veljarafundi í Pennsylvania farna vikuskifti.
– Í hesu løtu royna leiðarar í Demokratiska Flokkinum at ógilda úrslitið av undanvalinum hjá teirra egna flokki fyri at droppa korrupta Joe Biden, sigur Trump.
– Sum tit síggja, er Demokratiski Flokkurin als ikki ein flokkur fyri fólkaræði.
Sambært Ritzau hava yvir 30 demokratar í Kongressini - harímillum fýra senatorar - heitt á Biden um ikki at stilla uppaftur. Men higartil hevur Biden víst aftur, at hann fer at gevast.
Á veljarafundinum vísti Trump eisini aftur, at hann sjálvur skuldi verið ein hóttan móti fólkaræðinum.
– Tey blíva við at siga, "han er ein hóttan móti fólkaræðinum". Í farnu viku tók eg eina kúlu fyri fólkaræðið, sigur Trump og sipar til morðroyndina í Pennsylvania, har ein 20 ára gamal maður skeyt eftir honum og rakti hann í oyrað.
Vinarliga broyt tínar kennifíla - og privatlívsstillingar fyri at síggja hetta innihald