– Eingin er tryggur fyrr enn øll eru trygg

Lond, sum taka egin áhugamál framum onnur í royndini at tryggja sær nóg mikið av einum møguligum koppingarevni móti korona, gera støðuna við farsóttini verri.

Tað sigur Tedros Adhanom Ghebreyesus, aðalstjóri hjá Heimsheilsustovninum, WHO í dag.

Higartil hava ES, Stórabretland, Sveis, og USA gjørt avtalu við fyritøkur, sum eru í ferð við at menna eitt koppingarevni.

Men eingin er tryggur, fyrr enn øll eru trygg, sigur aðalstjórin í WHO sambært Reuters.

Hann hevur sent bræv til allar limir í WHO við áheitan til tey um at gerast partur av COVAX, eitt átak, sum skal tryggja eina rættvísa útbýting av koppingarevni móti korona tvørturum landamørk og samfelagsbólkar.