– Fáa ongantíð tørv á at brúka vápnini

Hvítarussland fer ongantíð at hava tørv á at brúka kjarnorkuvápnini, sum Russland fer a seta upp í landinum. Talan verður bert um ræðuvápn, sigur Aleksandr Lukasjenko, forseti í Hvítarusslandi.

– Eg eri vísur í, at vit ongantíð fáa tørv á at brúka tey, meðan tey eru her. Og eingin fíggindi fer at traðka á okkara land, sigur hann sambært Ritzau.

Tað var í mars, at tað kom fram, at Russland hevur ætlanir um at seta upp taktisk kjarnorkuvápn á hvítarussiska jørð. Í mai varð formliga avtala undirskrivað um hetta, og fyri nøkrum vikum síðani varð boðað frá, at vápnini skuldu setast upp í juli.

Taktisk kjarnorkuvápn hava ongantíð verið brúkt í kríggi. Lukasjenko segði tó í juni, at vápn vóru komin til Hvítarusslands, og at hann ikki fór at aftra seg við at brúka tey, um hetta gjørdist neyðugt. Fyrst hevði hann tó viljað  spurt Russland um ráð.