– Fólk í Myanmar skulu ikki góðtaka hetta

Fólk í Myanmar skulu ikki góðtaka eitt kvetti, sum herurin framdi tíðliga í morgun, sigur politiski leiðarin í landinum, Aung San Suu Kyi, sum varð millum teirra, ið varð handtikin av herinum.

Í fráboðan, sum er almannakunngjørd á Facebook-síðuna hjá flokki hennara, National League for Democracy (NLD), heitir hon í staðin á fólkið um at mótmæla.

Sambært NLD varð fráboðanin tó skrivað áðrenn kvettið, og varð hon eisini brúkt undir valstríðnum hjá flokkinum.

Eingin hevur sæð Suu Kyi alment, síðan hon varð handtikin í morgun, skrivar Ritzau.

Les eisini: Myanmar: Herurin hevur tikið valdið

Á valinum í Myanmar í november gjørdist tað ein stórsigur til NLD, men hernaðarflokkurin, Union Solidarity and Development Party (USDP) vildi vera við, at valsvik varð framt.

Tá málið kom fyri hægstarætti fríggjadagin fekk USDP tó ikki viðhald, og herurin segði eisini í farnu viku, at eitt møguligt kvetti ikki kundi útilokast.