Uttanlands

– Harðskapurin skal steðgast og tey handtiknu skulu leyslatast

Aðalskrivarin hjá ST, António Guterres kemur við áheitan til herin í Myanmar

António Guterres (Mynd: EPA)

António Guterres (Mynd: EPA)

2021-02-22 12:02 Author image
Alda Nielsdóttir
placeholder

Herurin í Myanmar, sum fyri trimum vikum síðani tók valdið í landinum, skal lata landið aftur í hendurnar á demokratiskt valdu stjórnini, sigur aðalskrivarin hjá ST, António Guterres.

Tað var 1. februar, at demokratiskt valdi leiðarin í landinum, Aung San Suu Kyi varð handtikin saman við fleiri øðrum limum úr flokki hennara, National League for Democracy (NLD).

Síðan tá hava stór mótmæli verið í Myanmar, og hetta hevur fingið herin at sláa hart niður á mótmælisfólkini.

Guterres heitir á herin í Myanmar um at leyslata tey handtiknu og at steðga við harðskapinum. Herurin skal virða mannarættindini og fólksins vilja, sum gjørdist greiður á seinasta vali í november, sigur hann sambært Ritzau.

Herurin í Myanmar sigur, at orsøkin til hernaðarkvettið var, at valsvik varð framt í sambandi við valið í heyst, har flokkurin hjá Suu Kyi vann stórt.

Bæði altjóða eygleiðarar og valnevndin í Myanmar hava tó víst aftur, at valvik skal hava verið framt.

placeholder
placeholder