Alda Nielsdóttir
Russiski forsetin, Vladimir Putin er opin fyri at tosa við nývalda amerikanska forsetan, Donald Trump um kríggið í Ukraina, sigur hann við russiskt sjónvarp.
Putin sigur, at sambandið við Trump er pragmatiskt og byggir á álit. Eisini sigur hann, at vit kundu verið sloppin undan kríggi í Ukraina, um "valsigurin í 2020 ikki varð tikin frá Trump".
Tað var demokraturin Joe Biden, sum sigraði á forsetavalinum í 2020 og gjørdist forseti frá januar 2021, til Trump yvirtók embætið farna mánadag. Trump heldur tó framvegis uppá, at sigurin hjá Biden varð stolin, og at umfatandi valsvik varð framt.
– Eg kann ikki annað enn at vera samdur við hann í, at um hann var blivin forseti - um sigur hansara ikki varð stolin í 2020 - so hevði kanska eingin kreppa verið í Ukraina, sigur Putin sambært Ritzau.
Hvussu vit vóru sloppin undan krígnum í Ukraina, um Trump varð blivin forseti fyri fýra árum síðani, sigur Putin einki um.
Undir Biden var USA størsti einstaki stuðulin hjá Ukraina í sambandi við kríggið. Tað er ógreitt, hvussu amerikanski stuðulin verður frameftir. Trump hevur undir frosetavalstríðnum funnist at stuðlinum til Ukraina, og hevur hann sagt, at hann kundi fáa ein enda á krígnum uppá ein dag. Seinni hevur hann tó ásannað, at tað kann taka upp til eitt hálvt ár. Eisini hevur hann sagt, at hann ætlar at seta í gildi nýggj revsitiltøk móti russum, um Putin ikki megnar at fáa ein enda á krígnum.
Vinarliga broyt tínar kennifíla - og privatlívsstillingar fyri at síggja hetta innihald