– Revsitiltøkini minna um krígsavbjóðing

Revsitiltøkini hjá vesturheiminum minna um eina krígsavbjóðing, sigur russiski forsetin, Vladimir Putin.

– Tey tiltøkini, sum eru sett í gildi, kunnu samanberast við einari krígsavbjóðing, men tíbetur er tað ikki komið hartil, sigur hann sambært Ritzau.

Hann ávarar eisini um, at onnur lond verða roknað sum partur av krígnum, um tey steingja loftrúmið yvir Ukraina.

Ukrainski forsetin, Volodmir Zelenskij hevur annars fleiri ferðir heitt á Nato-londini um at gera júst hetta, men tað hava tey ikki gjørt, tí tey stúra fyri, at tað kann gera støðuna verri.

Putin sigur eisini, at um at Nato-londini ganga umbønini hjá Zelenskij á møti, fer tað at fáa vanlukkuligar avleiðingar fyri Evropa og restina av heiminum.