– Skulu ikki aftur í ES

Bretar fara ikki aftur í ES, hóast teir skuldu fingið eina Labour-stjórn eftir valið 4. juli.

Tað sigur formaðurin í andstøðuflokkinum Labour, Keir Starmer sambært The Guardian.

Labour, sum sambært veljarakanningum stendur til at vinna valið, var annars ímóti brexit - at fara úr ES - tá fólkaatkvøða var um hetta í 2016.

Orsøkin til, at flokkurin ikki ætlar sær aftur í ES er politiski ófriðurin sum var í árunum eftir fólkaatkvøðuna, og bretar hava ikki tørv á meira ófriði, sigur Starmer.

– Vit fara ikki aftur í ES, sigur hann.

– Tað er ikki ætlanin. Tað hevur tað ongantíð verið.