– Ukraina kann gerast Nato-limur uttan hersett øki

Anders Fogh Rasmussen, fyrrverandi aðalskrivari hjá Nato hevur skotið upp, at Ukraina verður innlimað í verjusamgonguna uttan tey øki, sum eru hersett av Russlandi í løtuni.

Ein lutvís upptøka sendir eina ávaring til Russland um, at russar ikki kunnu forða Ukraina í at gerast partur av Nato, og við at útihýsa tey hersettu økini fer tað at minka um vandan fyri, at stríð verður millum Nato og Russland, sigur hann í samrøðu við The Guardian.

Næsti Nato-toppfundur verður hildin í Washington í juli næsta ár, og sambært Anders Fogh Rasmussen er tíðin komin at taka eina avgerð um ukrainskan Nato-limaskap.

– Tíðin er komin at taka næsta stigið og bjóða Ukraina at gerast limur í Nato, sigur hann.