13 franskir hermenn deyðir í tyrluvanlukku

13 franskir hermenn eru deyðir í eini tyrluvanlukku í afrikanska landinum Mali.

Franski forsetin, Emmanuel Macron upplýsir, at hermenninir doyðu, tá tvær tyrlur rendu saman meðan tær vóru úti á uppgávu í stríðnum móti islamistum.

Forsetaskrivstovan upplýsir sambært fronskum miðlum, at ein stríðstyrla av slagnum Tiger og ein flutningstyrla av slagnum Cougar vóru við í vanlukkuni í Menaka-landslutinum í landsynningspartinum av Mali.

Hermenninir vóru við í fronsku Operation Barkhane, sum hevur til endamáls at berja niður islamistisku yvirgangsdeildir í Sahel-landslutinum. 4.500 franskir soldatar eru sendir til økið.