Alda Nielsdóttir
Um vikuskiftið vórðu 141 fólk í Norðoyggjum koppsett fyri korona. Sjey teirra fingu fyrru koppsetingina, og 134 fingu seinnu koppsetingina, og eru tey sostatt liðugt koppsett.
Tey flestu av teimum koppsettu eru búfólk á røktarheimum.
Við hesum eru tilsamans 8.068 koppsetingar gjørdar í Føroyum. 4.260 fólk hava fingið fyrru koppsetingina, meðan 3.808 hava fingið báðar koppsetingarnar og eru liðugt koppsett.
Hetta svarar til, at átta prosent av fólkinum í Føroyum hava fingið fyrru koppseting, meðan 7,2 prosent av fólkinum eru liðugt koppsett.
Nú er ein lítil steðgur í koppsetingini, til næsta sendingin við koppingarevni kemur til landið.
Sambært corona.fo kemur nýggj sending við flogfarinum mikukvøldið, og síðani verður koppsetingin tikin uppaftur hósdagin. Tá eru tað fólk á bústovnum hjá Almannaverkinum, sum verða koppsett.
Vinarliga broyt tínar kennifíla - og privatlívsstillingar fyri at síggja hetta innihald