15 útlendskir felagsskapir blakaðir úr Russlandi

15 útlendskir felagsskapir eru blakaðir úr Russlandi. Tað boðar russiski løgmálaráðharrin frá sambært Ritzau.

Talan er m.a. um mannarættindafelagsskapir sum Amnesty International og Human Rights Watch.

Orsøkin til, at hesir felagsskapir ikki longur sleppa at virka í Russlandi er, at teir hava brotið lógir í Russlandi, verður sagt.

Human Rights Watch, sum hevur virkað í Russlandi í 30 ár, skrivar á Twitter, at eingin ivi er um, at hetta stigið er eitt aftursvar til teirra dekning av krígnum í Ukraina.

Human Rights Watch vil m.a. vera við, at tey hava dokumenterað fleiri dømi um krígsbrotsverk, sum russiskir hermenn hava framt í Ukraina.

Amnesty International hevur havt skrivstovu í Moskva síðan 1993, og er felagsskapurin bert tann seinasti av mongum at verða revsaður fyri at verja mannarættindi og siga russisku myndugleikunum sannleikan, sigur Agnés Callamard, aðalskrivari hjá Amnesty International.