16 føroysk børn kynsliga misnýtt á netinum

Kanningararbeiðið í stóra groomingmálinum er liðugt. Niðurstøðan er, at í alt 16 føroysk børn hava verið fyri kynsligum ágangi á alnótini.

Misnýtslan er framd á fleiri sosialum miðlum. Tað er serliga farið fram á Snapchat, men tó eisini á TikTok og F3.

Ein maður hevur sitið varðhaldsfongslaður í málinum síðani 22. juni í ár. Málið kemur fyri í Føroya Rætti í morgun. 

Politiið hevur eisini handtikið tveir aðrar menn í sambandi við kanningararbeiðið og skuldsett teir fyri kynsligan ágang móti børnum.

Annar teirra varð handtikin á flogvøllinum í Vágum, tá hann var ávegis til Føroya at hitta eitt av børnunum, sum hann hevði havt samband við á sosialu miðlunum. Av tí at maðurin býr í Dammark, varð tað málið latið politinum í Danmark til víðari kanningar.

Tann triði maðurin vísti seg ikki at vera partur av sjálvum groomingmálinum. Kanningararbeiðið hjá politinum avdúkaði tó, at hann í fleiri førum hevði havt samlegu við eitt barn, sum tá var undir 15 ár. Sambandið við tað barnið byrjaði eisini á sosialu miðlunum.

Hetta málið varð kannað fyri seg, og dómur fall í Føroya Rætti tann 4. september í ár, har maðurin varð dømdur sjey mánaða treytaleysa fongsulsrevsing. Málið er kært til Eystara Landsrætt.

Føroya Politi