Suðurstreymoyar Javnaðarfelag hevur nú kunngjørt valevnislistan til løgtingsvalið 8. desember.
Á listanum, ið telur 17 fólk, eru fleiri nýggj og kend nøvn.
Millum teirra eru Herborg Torkilsdóttir, tónleikari, Uni Holm Johannesen, journalistur, og Bjarni Arge, ið er kendur sum onnur røddin í poddvarpinum Amatøroyar.
Onnur nøvn á listanum eru formaðurin, Aksel V. Johannesen, Heðin Mortensen, borgarstjóri í Tórshavnar kommunu, og býráðslimir í Tórshavnar Býráð, Kristianna Winther Poulsen og Bjørg Dam.
Á seinasta løgtingsvali gjørdist Aksel V. Johannesen, ið tá var løgmaður, toppskorari á valinum við 2.323 persónligum atkvøðum.
Høvuðsstaðarborgarstjórin gjørdist nummar fýra á listanum hjá Javnaðarflokkinum við 429 persónligum atkvøðum. Hann umboðaði Javnaðarflokkin á tingi fram til januar 2021, tá hann aftur tók við borgarstjórasessinum.
Kristianna Winther Poulsen gjørdist á seinasta løgtingsvali nummar níggju við 245 atkvøðum, og Bjørg Dam gjørdist nummar 14 við 146 atkvøðum.
Tey, sum stilla upp fyri Javnaðarflokkin í Suðurstreymi eru:
- Birita Iversen
- Birna Heinesen
- Bjørg Dam
- Herborg Torkilsdóttir
- Kristianna W Poulsen
- Laura Apol
- Malan á Dunga
- Margit Stórá
- Sára Gullfoss
- Aksel V Johannesen
- Bjarni Arge
- Hans Jacob Thomsen
- Heðin Mortensen
- Marnar Fríðheim Kristiansen
- Óli Jákup Jacobsen
- Súni Selfoss
- Uni Holm Johannesen
Vinarliga broyt tínar kennifíla - og privatlívsstillingar fyri at síggja hetta innihald