Alda Nielsdóttir
Fríggjadagin vórðu 190 krígsfangar leyslatnir í fangabýti millum Russland og Ukraina.
95 fangar úr hvørjum landi vórðu leyslatnir í eini avtalu, sum varð fingin í lag við hjálp frá Sameindu Arabisku Emiratunum, upplýsir russiska verjumálaráðið.
Ukrainski forsetin, Volodymyr Zelenskyj hevur eisini lagt eina videoupptøku á Telegram av fleiri monnum, sum fara úr einum bussi, har teir verða fevndir av fólki.
Russland og Ukraina hava fleiri ferðir býtt um fangar, síðan kríggið millum londini byrjaði í februar 2022. Ofta eru avtalurnar gjørdar við hjálp frá semingsmonnum úr Sameindu Arabisku Emiratunum, Saudiarabia ella Turkalandi, skrivar Ritzau.
Sambært ukrainska umboðsmanninum fyri mannarættindi, Dmytro Lubinets, hava Russland og Ukraina nú býtt um fangar 58 ferðir, síðan kríggið byrjaði. Í hesum tíðarskeiðnum eru tilsamans 3.767 ukrainskir krígsfangar leyslatnir.
Vinarliga broyt tínar kennifíla - og privatlívsstillingar fyri at síggja hetta innihald