289 nýggj lesandi - við masku

289 nýggj lesandi høvdu sín fyrsta dag á Fróðskaparsetrinum í dag.

Innleiðsluvikan er vanliga full av stórum tiltøkum við nógvum luttakarum, men Covid-19 hevur skert teir møguleikarnar í ár. Fyri at halda tilmælini um frástøðu hevði Setrið í dag býtt tey lesandi á fyrsta ári upp í smærri bólkar, og tilsamans vórðu átta tiltøk hildin í dag, skrivar Setrið á heimasíðuni.

Byrjað varð í Kongshøll á Vestaru bryggju klokkan níggju í morgun, har umleið hálvthundrað nýggj lesandi á sjúkrarøktarfrøði møttu. Øll, sum kundu, vórðu biðin um at vera í masku, og hetta setti sín dám á prátið millum tey lesandi og undirvísarar. 

(Mynd: Brynhild Thomsen / Fróðskaparsetrið)

At vera í masku er nýtt fyri tey flestu, og hesar ungu kvinnurnar tosaðu eisini um, hvussu løgið tað kennist. Maska verður annars ikki kravd, tá neyðuga frástøðan kann haldast.