placeholder
Uttanlands

3,7 milliónir tons av mati flutt úr ukrainskum havnum

Síðan fyrst í august eru 165 farmaskip, ið hava havt tilsamans 3,7 milliónir tons av korni og øðrum landbúnaðarvørum umborð, farin úr ukrainskum havnum

(Savnsmynd)

(Savnsmynd)

2022-09-18 13:12 Author image
Alda Nielsdóttir
placeholder

Fyrst í august kundi korn og annað aftur flytast úr Ukraina umvegis Svartahavið, eftir at ST og Turkaland høvdu gjørt avtalu um útflutning við Ukraina og Russland, sum nú hava verið í kríggj í nærum sjey mánaðir. Og síðan avtalan kom í gildi eru 165 skip farin úr Ukraina.

Sambært Reuters hava hesi skipini havt tilsamans 3,7 milliónir tons av korni og øðrum landbúnaðarvørum umborð.

Í dag er eisini ætlanin, at 10 skip við tilsamans 169.300 tons av landbúnaðarvørum umborð skulu fara úr Ukraina.

Áðrenn kríggið var Ukraina ein av størstu kornútflytarunum í heiminum. Undir krígnum hevur Russland tó blokerað fyri útflutninginum, men eftir at avtalan kom í lag í juli, varð latið upp fyri útflutninginum aftur.

Tær tríggjar ukrainsku havnirnar, sum eru latnar uppaftur sambært avtalu við Russland, kunnu senda millum 100 og 150 farmaskip av stað um mánaðin.

placeholder

Vinarliga broyt tínar kennifíla - og privatlívsstillingar fyri at síggja hetta innihald

placeholder