49 koronutilburðir í gjár

Talið á nýggjum koronutilburðum hevur verið lágt hesar seinastu dagarnar í mun til hvat tað var í síðstu viku.

49 nýggir tilburðir vóru staðfestir í teimum 2.393 kanningunum, sum eru gjørdar seinasta samdøgrið. Samstundis eru 78 fólk staðfest frísk aftur, og talið á positivum tilburðum í løtuni er nú komið niður á 358. Tað er 29 færri enn í gjár.

Fimm eru innløgd í Sjúkrahúsverkinum við korona. Hetta er sama tal sum, tá tølini seinast vóru dagført.

Ógreitt er hvussu nógv fólk eru í sóttarhaldi. Heilsumálaráðið upplýsir fyri Portalinum, at hetta talið ikki verður dagført í løtuni.