5.104 føroyingar luttóku í kanning hjá Fólkaheilsustýrinum

Í september fingu 8.000 tilvildarliga valdir føroyingar innbjóðing sendandi um at luttaka í fólkaheilsukanningini ”Hvussu hevur tú tað?”. Svarast kundi fram til 13. november, og 5.104 av 8.000 svaraðu spurnablaðnum.

Fólkaheilsustýrið, sum stendur fyri kanningini, sigur seg fegnast um undirtøkuna og takkar øllum luttakarunum fyri íkastið, teir hava latið.

– Vit eru ovfarin av góðu móttøkuni. Svarprosentið liggur á heili 63,8 %, sum er rættiliga høgt, sigur Vár Honnudóttir, verkætlanarleiðari.

Í 2019 lá svarprosentið fyri somu kanning niðanfyri 50 %. Samanborið við samsvarandi kanningar í grannalondunum hevur føroyska kanningin eisini munandi betri undirtøku.

Fyri at fáa eina góða heildarmynd av heilsustøðuni í Føroyum, er týdningarmikið, at luttakararnir umboða føroyingar breitt. Hetta tykist vera eydnast væl í nýggju kanningini. Øll øki í landinum eru væl umboðað og samsvara væl við føroyska fólkið. Tendensurin við aldri og kyni líkist tí, sum vit vanliga síggja í slíkum kanningum, har kvinnurnar (53,4 %) eru eitt sindur raskari at svara enn menninir (46,6 %). Fólk millum 40 og 69 ár eru lutfalsliga væl umboðað, meðan aldurbólkarnir undir 39 ár og eldri enn 70 ár eru eitt sindur undirumboðaðir. Frávikini eru tó ikki so stór, at tey kunnu væntast at skeikla úrslitini munandi, skrivar Fólkaheilsustýrið.

– Liviumstøður, tørvur o.a. eru ymisk, alt eftir aldri og hvørjum øki tú býrt í, og tað sæst ivaleyst aftur í svarunum hjá fólki. Umráðandi er, at allir bólkar í samfelagnum verða hoyrdir, eitt nú fyri at setast kann inn við møguligum heilsuátøkum alt eftir tørvi hjá ymsu bólkunum, sigur Bjarni á Steig, stjóri í Fólkaheilsustýrinum, og fegnast um, at kanningin hevur rakt so breitt.

Kanningin fevnir rættiliga víða, og spurt verður m.a. um viðurskifti sum heilsu, trivnað, sjúku, rørslu, kost, miðlanýtslu og ávís sosial viðurskifti. Farið verður nú undir at greina tølini nærri.

Miðað verður ímóti, at úrslitini frá kanningini verða løgd fram í eini frágreiðing tíðliga komandi ár, og verða tey tá tøk hjá almenninginum. Væntast kann tó, at ávís úrslit verða løgd fram gjøgnum veturin. Eitt nú eru tølini fyri royking og tubbaksnýtslu ógvuliga viðkomandi júst nú í sambandi við arbeiðið at gera nýggja roykilóggávu í Føroyum, skrivar Fólkaheilsustýrið.