Alda Nielsdóttir
Tá amerikonsku forsetavalevnini Donald Trump og Kamala Harris kjakaðust í beinleiðis sjónvarpi náttina til mikudagin, fylgdu 67,1 milliónir hyggjarar við í sjónvarpinum.
Tað vísa upplýsingar frá greiningarfyritøkuni Nielsen.
Hesi tølini fevna bert um hyggjarar, sum fylgdu við í sjónvarpinum. Tey mongu, sum stroymaðu kjakið á netinum á t.d. YouTube ella heimasíðum hjá amerikonskum miðlum, eru tí ikki tald við.
Eitt nú hevði miðilin NBC News eina beinleiðis stroyming á YouTube, har 5,3 milliónir fólk fylgdu við, skrivar Ritzau.
Til samanberingar fylgdu umleið 51 milliónir við í sjónvarpinum, tá Trump kjakaðist móti táverandi forsetavalevninum hjá demokratunum, Joe Biden.
Metnógvir sjónvarpshyggjarar fylgdu við í 2016, tá Trump og táverandi demokratiska forsetavalevnið Hillary Clinton kjakaðust. Tey kjakaðust tríggjar ferðir, og 84 milliónir sjónvarpshyggjarar fylgdu við tí eina kjakinum.
Vinarliga broyt tínar kennifíla - og privatlívsstillingar fyri at síggja hetta innihald