Ingi Samuelsen
87 ára gamla Tove Macdonald, sum er fødd í Danmark, er nú vorðin miðdepil í Brexit-kjakinum í Bretlandi. Brexit noyðir hana at skráseta seg fyri at sleppa at vera verðandi í landinum.
- Eg havi onga staðni at fara. Hetta er heim mítt, sigur 87 ára gamla Tove Macdonald, ið sigur seg vera meira skotska enn danska. Hóast hon er fødd í Keypmannahavn, hevur hon búð meginpartin av lívi sínum í Skotlandi.
Sum útlendskur ríkisborgari er trupulleikin hjá Tove, at hon skal skráseta seg hjá myndugleikunum, um hon vil vera verðandi í landinum eftir Brexit. Skrásetingin skal fara fram seinast 20. juni 2021 á heimasíðuni hjá innanríkisráðnum.
Tove, sum ikki kennir seg trygga við teldutøkni dámar hetta einki.
- Eg gerðis kedd av hesum. Eg trúði ikki, at tað kundi vera rætt eftir sum eg havi búð her í so nógv ár, sigur hon í samrøðu við skotsku sjónvarpsstøðina STV News.
Og hennara boð eru nú hoyrd av skotskum politikarum. Leiðarin í størsta flokkinum í Skotlandi, SNP, Nicola Sturgeon, fyrstiráðharri, skrivar á Twitter, at hon hevur samkenslu við Tove.
Watching this makes me feel sad and angry in equal measure. Tove, Danish born, has lived in Scotland for 59 years and asks this reasonable question - “at 87, why do I have to register?” The one word answer is “Brexit”. Tove - this is your home, Scotland wants you here. https://t.co/gsUFJ4l5TM
— Nicola Sturgeon (@NicolaSturgeon) 5. marts 2019
Og í gjár varð Theresa May, forsætisráðharri, í tjóðartinginum í London biðin um at viðmerkja støðuna, sum gamla danska konan er komin í.
- Hetta er hjartaleysur politikkur, segði bólkaleiðarin hjá SNP í undirhúsinum, Ian Blackford, í viðmerking til Theresa May.
Forsætisráðharrin lat seg tó ikki ávirka. Hon segði, at ES-borgarar, eitt nú frú Macdonald, sleppa at vera verðandi í landinum – líka mikið hvat hendir við Brexit.
Vinarliga broyt tínar kennifíla - og privatlívsstillingar fyri at síggja hetta innihald