placeholder
Uttanlands

Advokatur: Skal ikki kunna søkja um royndarleyslating á hvørjum ári

Tað er greitt, at Anders Behring Breivik ikki hevur havt stóra persónliga framgongd seinastu tíggju árini, og verður tað sera tungt fyri tey avvaraðandi, um hann á hvørjum ári kann søkja um at verða leyslatin, sigur norskur ríkisadvokatur

(Savnsmynd)

(Savnsmynd)

2022-01-21 08:41 Author image
Alda Nielsdóttir
placeholder

Innanfyri fáar vikur væntast ein avgerð í rættarmálinum, har støða skal takast til, um Anders Behring Breivik, sum er dømdur fyri yvirgang, kann royndarleyslatast.

Hann hevur sitið inni í tíggju ár, eftir at hann drap 77 fólk í Oslo og á ungdómsleguni á Utøya í juli 2011.

Í 2012 varð Breivik dømdur 21 ára forvaring, og eftir tíggju ár hevur hann rætt til á hvørjum ári at søkja um at verða royndarleyslatin. Hetta eigur at verða broytt, sigur ríkisadvokaturin Tor-Aksel Busch við VG.

Hetta er sera tungt fyri avvarðandi hjá teimum dripnu, sigur hann.

– Tað er rættiliga greitt, útfrá tí, sum er komið fram í miðlunum, at Breivik ikki hevur havt stóra persónliga framgongd, sigur hann.

– Nógv bendir á, at hann um eitt ár fer at vera í akkurát somu støðu sum í dag, og at vandin fyri endurtøku fer at vera líka stórur.

Norski ákærumyndugleikin hevur heitt á dómstólin í Skien, har Breivik hevur søkt um at verða royndarleyslatin, um at avvísa umbønina, skrivar Ritzau.

placeholder

Vinarliga broyt tínar kennifíla - og privatlívsstillingar fyri at síggja hetta innihald

placeholder