Ætlar at senda ómannað rúmdarfør til Mars um tvey ár

Rúmdarfelagið hjá ríkmanninum Elon Musk, SpaceX ætlar at senda fimm ómannað Starship-rúmdarfør til Mars um tvey ár.

Tað boðar Musk sjálvur frá á sínum sosiala miðli X.

– Um tey lenda trygt verða mannaðar ferðir møguligar um fýra ár. Um har verða avbjóðingar, verða mannaðar ferðir útsettar í tvey ár afturat, skrivar hann.

Málið hjá Elon Musk er, at einhvør, sum ynskir at ferðast út í rúmdina, skal verða førur fyri at fara til Mars.

– Einaferð fara Starships í túsundatali at fara til Mars, og tað verður ein stórfingin sjón, skrivar hann sambært Ritzau.