Aftur innbroti í hjalli

Leygardagin um middagsleitið fekk løgreglan eina fráboðan um, at onkur hevði stolið rúsdrekka úr einum hjalli í Havn. Eingin varð skuldsettur í málinum, og fyrrapartin í gjár varð aftur boðað frá innbroti í sama hjalli.

Tjóvurin hevði tikið sjey kassar av øl. Vaktleiðarin á politistøðini sigur, at í mun til fyrru ferð, var hjallurin læstur.

Tað kemur av og á fyri, at løgreglan fær fráboðanir um, at onkur hevur stolið úr einum hjalli. Sum oftast er tað rúsdrekka ella kjøt, sum verður stolið.

Seinnapartin í gjár varð eisini boðað frá nógvum royki úr einari garasju í Klaksvík, og sløkkiliðið varð sent á staðið.

Løgreglan veit ikki rættiliga, hvat tað er, sum er hent, men møguliga er eldur komin frá einum bensindrivnum amboði.

Málið verður kannað nærri í dag.

Beint eftir midnátt í gjár fekk løgreglan eisini eina fráboðan um harðskap.

Tað vóru nøkur, sum vóru farin at klandrast í sambandi við einum býtúri. Eingin hevur fingið álvarsaman skaða.

Júst hvat tað er, sum er hent fær løgreglan ikki sagt, tí partarnir eru enn ikki vorðnir avhoyrdir.