Áhugafelag fyri lærarar í føroyskum verður sett á stovn

Bjóðað verður til stovnandi aðalfund hjá felagi fyri lærarar í føroyskum í kvøld. Fundurin verður á Miðnámi á Kambsdali klokkan 19.

Áhugafelagi fyri lærarar í móðurmálinum er ætlað til lærarar í føroyskum á øllum stigum -  úr barnagarði til fróðskaparsetur. 

Stigtakararnir siga, at felagið skal gagna frálæruni í føroyskum á øllum stigum úr barnagarði til fróðskaparsetur. Hugsanin er, at felagið skal elva til samstarv millum lærarar í føroyskum, skal skipa fyri fakligum og námsfrøðiligum kjaki og tiltøkum og harumframt at hava samstarv við móðurmálslærarafeløg í hinum Norðurlondunum.

Á skránni verður millum annað val av viðtøkum fyri felagið og val av nevnd. Katrin Næs, Henrietta A. Jacobsen, Jastrid á Dalbø og Óluva Klettskarð eru stigtakarar.