ALS er nú á Vanganum

Um mann gerst arbeiðsleysur er tað nú lættari og tryggari at avgreiða síni viðurskifti við ALS, sum nú er komið á Vangan.

– Vit hava í eina tíð arbeitt við at fáa ment nakrar av sjálvgreiðslunum hjá okkum til Vangan, og nú er komið á mál. Í fyrsta umfari er talan um tríggjar sjálvgreiðslur: Søk um arbeiðsloysisstuðul, Vátta arbeiðsloysi, og Boða frá broytingum, skrivar ALS í tíðindaskrivi.

– Á Vanganum fáa okkara viðskiftafólk eisini lættari atgongd til teirra upplýsingar. Eitt nú síggja tey, hvussu langt ávegis viðgerðin av eini møguligari umsókn er komin, tey síggja, hvør teirra málsviðgeri er, tey síggja øll skjøl í teirra málum, og hvørji skjøl møguliga mangla, og nær hesi skulu verða latin ALS. Tey síggja, nær næsta útgjaldið verður, og hvussu nógv útgjaldið er, umframt at tey verða mint á, nær tey skulu vátta arbeiðsloysi, bert fyri at nevna nøkur dømi.

ALS sigur, at tað er týdningarmikið at fylgja við talgildu menningini, soleiðis at tey kunnu bjóða viðskiftafólkum eina nýmótans, trygga og skjóta tænastu, har tey hava møguleikan at avgreiða síni viðurskifti allar tíðir á samdøgninum.

Sjálvgreiðslan á Vanganum er longu virkin, og gamla sjálvgreiðsla letur aftur 19. oktober.