Alda Nielsdóttir
Amerikanski sjónleikarin Danny Masterson, sum er kendur úr røðini "That '70s Show" hevur fingið lívlanga fongsulsrevsing við møguleika fyri royndarleyslating eftir 30 ár.
Tað hevur ein dómstólur í Los Angeles avgjørt, eftir at hann í juni varð funnin sekur í at hava neyðtikið tvær kvinnur í heimi sínum í ávikavist 2001 og 2003.
Málið vakti ans, tí at Masterson hevði hitt kvinnurnar gjøgnum Scientology-kirkjuna. Sambært kvinnunum hevði kirkjan fingið tær at aftrast við at melda málið. Hesum vísir kirkjan aftur og leggur afturat, at trúgvin hjá Masterson ikki eigur at spæla nakran leiklut í málinum.
47 ára gamli Masterson spældi í "That '70s Show" saman við kenda parinum Mila Kunis og Ashton Kutcher. Røðin varð fyrstu ferð víst í árunum 1998 til 2006. Í 2017 varð Masterson koyrdur frá Netflix-røðini "The Ranch", tá ákærurnar um neyðtøku komu fram.
Vinarliga broyt tínar kennifíla - og privatlívsstillingar fyri at síggja hetta innihald