Ann Fuglø er byrjað sum tekniskur leiðari hjá Eiðis kommunu

1. november byrjaði Ann Fuglø í starvi sum tekniskur leiðari hjá Eiðis kommunu. Ann bleiv útbúgvin byggifrøðingur í 1996, og hevur drúgvar royndir, bæði á teknistovu, byggivinnu og í kommunalari umsiting.

Hesum boðar Eiðis kommuna frá á heimasíðu sínari í dag. 

- Setanin av tekniskum leiðara hevur við sær, at Eiðis kommuna kann bjóða bæði vinnu og borgarum eina enn betur tænastu, samstundis sum teknisk viðurskiftir í kommununi verða betur skipaði.

Í hesum sambandi er eisini greitt, at broytingar verða gjørdar í umsitingini í Eiðis kommunu. 

Tí samstundis sum tekniska økið er uppraðfest, við tað at tekniskur leiðari er settur í starv, hevur bygdaráðið samtykt, at borgarstjórastarvið verður broytt til hálvtíðarstarv frá 1. januar 2023. Tað skrivar eidi.fo.

Hetta kemst av, at tekniski leiðarin kemur at taka nakrar av teimum uppgávum, sum hava ligið á borgarstjóranum, verður upplýst úr Eiðis kommunu.

Í løtuni er Rógvi Egilstoft í fulltíðarstarvi sum borgarstjóri í Eiðis kommunu. Nú fer tekniski leiðarin at taka nakrar av teimum uppgávum, sum hava ligið á borgarstjóranum, á seg (Mynd: Jens Kr. Vang)