Arbeiðsloysið var 1,1 prosent í mars

Í mars var arbeiðsloysið í Føroyum 1,1 prosent, og tað svaraði til 346 fulltíðararbeiðsleys.

Í persónum vóru 402 rakt av arbeiðsloysi í mars, ið eru 110 fleiri enn í mars í fjør, tá arbeiðsloysið var 0,8 prosent, svarandi til 255 fulltíðararbeiðsleys, skrivar Hagstovan.

Í mars vóru 203 fulltíðararbeiðsleysir menn, ið svarar til 1,2 prosent - 0,3 prosentstig hægri samanborið við sama mánað í fjør.

Hjá kvinnum var arbeiðsloysið 1,0 prosent, ið svarar til 143 fulltíðararbeiðsleysar kvinnur. Tað er 0,2 prosentstig hægri enn sama mánað í fjør.

Í mars vóru 34 persónar ella 8,5 prosent av teimum arbeiðsleysu, langtíðararbeiðsleys. Tað vil siga, at tey hava verið arbeiðsleys í longur enn eitt ár, skrivar Hagstovan.