Atkvøða um abort í Kansas

Tá borgararnir í Kansas í dag fara á val, undanval til miðskeiðisvalini í november, skulu tey eisini taka støðu til ein annan spurning: Rættin til forturtøku.

Harvið verður Kansas tann fyrstu staturin, har borgararnir skulu taka støðu til abort-spurningin, eftir at hægstirættur í USA í juni ógildaði slóðbrótandi dómin kallaður “Roe v. Wade” frá 1973.

Dómurin tryggjaði, at ongin amerikanskur statur kundi taka rættin til fosturtøku frá kvinnum.

Í løtuni er fosturtøka lóglig í Kansas fram til 22. viku.

Um meiriluti er fyri at broyta rættin til fosturtøku, verður tað upp til politikararnar í Kansas – meirilutin er republikanskur – at gera av, hvørjar lógir skulu setast í gildi í statinum, skrivar dr.dk við Reuters sum keldu.