Atlantsflog vendi aftur í gjárkvøldið

Tá flogfarið hjá Atlantsflog, sum skuldi lenda í gjárkvøldið um 20-tíðina var á veg til Føroya, kom ein alarmur um eitthvørt teknisk brek.

Avgjørt var tí at venda aftur til Kastrup.

- Tað var ikki soleiðis, at nakar vandi var á ferð, sigur Jóhanna á Bergi, stjóri í Atlantsflogi.

Hon greiðir frá, at tey valdu at venda aftur til Kastrup heldur enn til Bergens ella Keflavíkar, tí eitt annað flogfar stóð klárt í Vágum til ein sjúkraflutning til Keypmannahavnar.

Fólkini, sum vóru við flogfarinum, sum vendi aftur, sluppu tí við hesum flogfarinum heim til Føroyar. Tað lendi í Vágum um eitt tíðina í nátt.

Jóhanna á Bergi veit ikki at siga, júst hvat er galið við flogfarinum, sum mátti venda aftur. Teknikarar frá Atlantsflog eru í morgun farnir til Keypmannahavnar at kanna flogfarið.