Uttanlands

Ávara um hóttanir móti gistingarhúsum í Kabul

USA og Stórabretland hava heitt á borgarar teirra um at halda seg burtur frá gistingarhúsum í afghanska høvuðsstaðnum

Kabul Serena Hotel í afghanska høvuðsstaðnum (Mynd: EPA)

Kabul Serena Hotel í afghanska høvuðsstaðnum (Mynd: EPA)

2021-10-11 08:15 Author image
Alda Nielsdóttir
placeholder

USA og Stórabretland ávara í dag borgarar teirra í afghanska høvuðsstaðnum Kabul um at halda seg burtur frá gistingarhúsum í býnum. Serliga verður ávarað ímóti gistingarhúsinum Kabul Serena Hotel í miðbýnum, ið er tað kendasta marglætisgistingarhúsið í Kabul.

Amerikanska uttanríkismálaráðið skrivar m.a. soleiðis:

– Amerikanskir ríkisborgarar, sum eru staddir á ella nærindis Serena Hotel eiga at fara frá økinum alt fyri eitt.

Víst verður til "trygdarhóttanir" í økinum.

Bretska uttanríkismálaráðið hevur eisini dagført áheitanina um ikki at ferðast til Afghanistan.

– Orsakað av økta vandanum verður mælt til ikki at búgva á gistingarhúsum, serliga ikki í Kabul (herundir Serena Hotel).

Áðrenn Taliban tók valdið í Afghanistan var Serena Hotel sera vælumtókt millum útlendsk ferðafólk.

Tvær ferðir áður hevur Serena Hotel verið mál fyri yvirgangsálopum.

Ávaringarnar hjá USA og Stórabretlandi koma í kjalarvørrinum á einum bumbuálopi móti einari mosku í norðurafghanska býnum Kunduz fríggjadagin.

Islamiski Statur hevur tikið ábyrgdina fyri sjálvmorðsálopið, sum varð framt undir fríggjadagsbønini.

Talan er um mest blóðuga álopið síðan amerikanski herurin fór úr Afghanistan í august. Afghanska tíðindastovan Bakhtar upplýsti fríggjadagin, at í minsta lagi 46 persónar høvdu latið lív, meðan 143 vórðu særd.

Moskan í Kunduz varð brúkt av shiamuslimum, sum eru ein minniluti í Afghanistan, har meirilutin er sunnimuslimar, skrivar Ritzau.

placeholder
placeholder