Avbjóðingar við vatni og gróti á vegnum

Veðrið hevur givið nógvar avbjóðingar fyri ferðsluna kring landið higartil í 2025, og aftur í gjárkvøldið noyddist Landsverk at ávara.

Hetta var, tí at sera nógv avfall var, og at veitir og tvørrennir í støðum ikki megnaðu at fylgja. Harvið vaks vatnstøðan á vegnum, eins og man sá ymsastaðni um vikuskifti.

Sí eisini: Kann vera vandamikið á vegunum

Vaktleiðarin á løgreglustøðini í Havn upplýsir fyrrapartin, at tað serliga vóru trupulleikar á tveimum strekkjum.

Hetta var millum Stykkið og Leynar umframt millum Kalbak og Kalbaksbotni. Millum Kalbaksbotn var tað serliga galið beint við eina á, og tað bar ikki til at koyra har eina løtu.  

Løgreglan fekk eisini tvær fráboðanar um grót á vegnum. Onnur kom úr Hundsarabotni týskvøldið. Hetta kom sum skilst í rættlag aftur. 

Í nátt kom fráboðan um ein stóran stein á vegnum Uppi á Helvtini á Oyndarfjarðarvegnum. Vaktleiðarin segði fyri løtu síðani, at bilar sleppa framvið, og at ein maskina skal til fyri at flyta steinin.