Avstralia: Tvey fólk deyð og 23 sløkkilisfólk særd

Skógareldarnar, sum í hesum døgum herja í fleiri avstralskum statum, kravdu í gjár tvey mannalív afturat – hesuferð nærindis býnum Adelaide í statinum South Australia.

Sambært Ritzau hava skógareldarnar í Avstralia nú kravt tilsamans tíggju mannalív, og í gjár vórðu 23 sløkkiliðsfólk eisini særd, tá teir stríddust við eldin í South Australia. Hjá einum teirra er støðan lívshættislig.

Í løtuni herja fleiri enn 200 skógareldar í landinum, og veðrið ger tað torført at fáa tamarhald á teimum.

Í vikuni varð Avstralia nevniliga rakt av ógvusligari hitabylgju. Tríggjar dagar á rað hevur miðalhitin í landinum sligið met. Nógvastaðni er hitin farin uppum 40 stig.

Í vikuni varð undantaksstøða eisini lýst í statinum New South Wales, har helvtin av skógareldunum herja.

Í dag eru 10.000 sløkkiliðsfólk og onnur tilbúgvingarfólk farin uppí stríðið móti skógareldunum í statinum. Seinastu vikurnar hava uml. 2000 sløkkilisfólk luttikið í stríðnum.