Belgiskur dómstólur: Kvinna sleppur nú at brúka heitið prinsessa

Ein belgisk kvinna hevur vunnið eitt rættarmál um at verða viðurkend sum prinsessa og dóttir av fyrrverandi konginum Albert II.

Albert II hevði annars víst aftur í fleiri ár, at hann skuldi verið pápi at 52 ára gomlu listakvinnuni Delphine Boël.

Men síðan hósdagin hevur hon kunnað rópt seg Delphine Saxe-Cobourg, eftir at ein kærudómstólur hevur váttað úrslitið av eini dna-roynd, upplýsir sakførarin hjá henni sambært Ritzau.

Umframt at hon sleppur at brúka kongaliga eftirnavnið Saxe-Cobourg, er umbønin hjá henni um at mann fer við henni eins og við systkin hennara, eisini gingin á møti.

– Ein sigur í rættinum kann ongantíð býtast um við kærleikanum hjá einum pápa. Men hann kann geva einum eina kenslu av rættvísi, sum verður styrkt av, at onnur børn, sum hava verið í líknandi støðum, kunn finna styrki til at gera nakað við tað, sigur Delphine Boël í skrivligari fráboðan.

Albert II var kongur í Belgia í árunum 1993 – 2013. Tá hann var ungur, hevði hann samband við mammu Delphine Boël uttanfyri hjúnalagið.

Søgan um Delphine Boël kom fram í belgisku miðlunum í 1999. Hon hevur leingi verið eitt kent andlit í Belgia.

Kongurin noktaði at góðtaka kravið hjá dóttrini um eina dna-roynd, men í fjør játtaði hann kortini, eftir at ein kærudómstólur avgjørdi, at hann skuldi rinda 5.000 evrur (37.200 krónur) í dagbøtur fyri hvønn dag hann noktaði.

Í januar ásannaði Albert kongur, at hann var pápi at Delphine Boël, eftir at dna-royndin hevði avdúkað hetta, men hann noktaði kortini at fara við henni sum við hinum børnunum. Tað málið hevur rætturin nú eisini avgjørt.

Albert II segði valdið frá sær í 2013, tá hann lat soninum Philippe trónuna.