Benjamin Netanyahu megnaði ikki at skipa stjórn

Ísraelski forsetisráðharrin, Benjamin Netanyahu, megnaði ikki at skipa stjórn, áðrenn freistin fór á midnátt (klokkan 22 føroyska tíð, red.) og tí skal skipast fyri nývali.

Netanyahu og flokkur hansara, Likud, høvdu annars fingið eitt gott val 9. apríl, tá tað eydnaðist teimum at fáa 35 av 120 plássum í ísraelska tjóðartinginum.

Men fyri at fáa meiriluta hevði flokkurin tørv á stuðli, men orsakað av ósemjum um herskyldu millum Netanyahu og nakrar av smærri flokkunum, eydnaðist tað ikki at gera samgongu, áðrenn freistin fór, skrivar DR.

Ísraelska tjóðartingið atkvøddi tí í gjárkvøldið um at upploysa tjóðartingið. 74 atkvøður vóru fyri, og 45 vóru ímóti.

Eftir ætlan verður nýval 17. september.