Alda Nielsdóttir
Á veljarafundinum, sum varð hildin í amerikanska statinum Nevada leygardagin, var tað Bernie Sanders, sum gjørdist stóri vinnarin. Tað er greitt, eftir at úrslitini frá øllum valstøðunum nú eru kunngjørd.
Tølini frá Edison Research vísa, at 78 ára gamli Bernie Sanders fekk stuðul frá 46,8 prosent av veljarunum. Fyrrverandi varaforsetin, Joe Biden fekk 20,2 prosent, og fyrrverandi borgarstjórin í South Bend, Indiana, Pete Buttigieg fekk 14,3 prosent.
Av teimum 36 valmonnunum í statinum fær Bernie Sanders 22, Joe Biden fær 7, og Pete Buttigieg fær 3.
Í Nevada fekk Bernie Sanders nógvan stuðul frá serliga latínamerikanskum veljarum, skrivar Ritzau.
Umframt Joe Biden og Pete Buttigieg, skal Bernie Sanders eisini kappast móti senator Elizabeth Warren og ríkmanninum Michael Bloomberg.
Sambært demokratiska flokkinum í Nevada, luttóku 105.195 veljarar á valfundunum leygardagin. Tað er fleiri enn í 2016, tá gott 84.000 luttóku, men færri enn tey 118.000, sum luttóku í 2008.
Vinarliga broyt tínar kennifíla - og privatlívsstillingar fyri at síggja hetta innihald