Bert sjey positiv eftir

Eingin nýggjur smittutilburður varð staðfestur í gjár, vísa nýggjastu tølini hjá Landslæknanum.

Støðan er sostatt framvegis tann, at 649 persónar hava fingið staðfest covid-19 í Føroyum, av teimum eru 641 staðfest frísk aftur, og ein er deyður. Hetta merkir, at sjey persónar eru positivir í Føroyum í løtuni.

Ein persónur er í løtuni innlagdur á Sjúkrahúsverki Føroya við covid-19, og 30 eru í sóttarhaldi.

Í gjár vórðu 380 kanningar gjørdar, og allar kanningarnar eru liðugt greinaðar. Tilsamans eru nú 214.642 kanningar gjørdar í Føroyum.

Dagførd kl. 12.31 við rætta talinum av fólki, sum eru í sóttarhaldi.