Besta úrslit seinastu fimm árini

Berg Motors Sp/f, sum heldur til á Staravegi 1 í Havn,  selur bilmerkini Suzuki, Subaru og elbilamerkið Airways. Harumframt selur og umboðar felagið lastbilamerkið Scania. Bilaútleigan er eisini ein týðandi partur av virkseminum, har felagið umboðar kendu bilútleigufeløgini Avis og Budget. 

Roknskapurin hjá Berg Motors vísir, at bruttovinningurin øktist úr 14,8 mió.kr. í 2020 til 22,8 mió.kr. í 2021, sum er ein vøkstur á heili 54 prosent. Tann hækkandi bruttovinningurin í 2021 gevur ábendingar um at sølan er økt. Ikki er upplýst um vøksturin stavar frá bilasøluni ella bilaútleigan.

Úrslitið áðrenn avskrivingar í 2021, eisini nevnt Ebidta, var 11,1 mió.kr., samanborið við 3,5 mió.kr. í 2020. Talan er um ein vøkstur á heili 7,6 mió.kr. ella 215 prosent.  

Ársúrslitið fyri 2021 var eitt avlop á 3,5 mió.kr., sum er heili 5,6 mió.kr. hægri enn úrslitið í 2020, sum var eitt hall á 2,1 mió.kr.  

Aðalfundurin samtykti at luta 500 tkr. út til eigaranr sum vinningsbýti. 

Fíggjarjavnin hjá Berg Motors minkaði úr 61 mió.kr. í 2020 til 54,9 mió.kr. í 2021.  

Støðisognin minkað við avskrivingunum úr 40 mió.kr. í 2020 til 33,8 mió.kr. í 2021. 

Ognir í umferð hevur verið støðug og var 21 mió.kr. í 2021. Serliga kann í 2021 síggjast at vørugoymsla er støðug á 10,3 mió.kr., áogn er økt 1,4 mió.kr. til 4,5 mió.kr. og at tøkur peningur er minkaður 800 tkr. til 6,2 mió.kr. 

Berg Motors hevði við árslok 2021 eina eginogn á 26,9 mió.kr. Hetta gevur eitt trygdarevni á 49 prosent, sum má metast at verða gott.   

Felagið hevur langfreiðstaða skuld á 19,5 mió.kr. viðarlok 2021, sum er 1,3 mió.kr. lægri enn í 2020. Stuttfreiðstaða skuldin er hinvegin minkað úr 14,1 mió.kr. í 2020 til 5,6 mió.kr. í 2021.  

Um hugt verður eftir lyklatølunum hjá Berg Motors sæst, at ognaravkastið, sum er úrslitið áðrenn fíggjarpostar í mun til samlaða fíggjarjavnan var 9 prosent, sum verður mett rímuliga gott. 

Eginpeningsavkastið var 16 prosent í 2021, sum eisini verður mett rímuliga gott. 

Samanumtikið eitt rímuliga gott úrslit hjá Berg Motors í 2021, sum eisini er besta úrslit síðstu 5 árini.  

Stjóri í Berg Motors Sp/f er Saroya Britt Dalsgarð. Nevndarformaður er Hálvdan Dalsgarð.  

Eigararnir av Berg Motors Sp/f eru ikki upplýstir í roknskapinum.

Greiningin er gjørd av Birgir Nielsen, á ráðgevarafyritøkuni Nira Sp/f.  www.nira.fo