Biljagstran í Eysturoynni

Í nátt var ein rættiliga óvanlig hending í Eysturoynni.

Stutt fyri midnátt fekk løgreglan illgruna um, at ein bilførari koyrdi ávirkaður av rúsdrekka í Rituvík, og tá løgreglan royndi at steðga bilinum, koyrdi viðkomandi undan, og so byrjaði ein longri biljagstran, sum endaði á Glyvrum, har løgreglan noyddist at koyra á bilin fyri at steðga honum.

Tað er rættiliga óvanligt, at fólk ikki steðga, og at neyðugt er við slíkari loysn, men hesin bilførarin koyrdi so óstøðugt, at ein sonevnd tilætlað ákoyrding var neyðug, sigur vaktleiðarin á løgreglustøðini í Havn, sum leggur afturat, at hvørki løgreglubilurin ella ákoyrdi bilurin fingu stóran skaða.

Bilførarin er skuldsettur fyri rúsdrekkakoyring, fyri ferðsluóhapp orsakað av rúsdrekkakoyring, og fyri ikki at gera eftir boðunum frá løgregluni, og møguliga verða onkrar aðrar skuldsetingar eisini, verður upplýst.