Bilur fór út av vegnum í Gøtudali

Tað hevur verið eitt friðarligt vikuskifti hjá løgregluni, hóast nógv fólk hava verið úti í samband við jólafrokost og annað.

Hetta upplýsir vaktleiðarin á løgreglustøðini í morgun.

Nøkur málrættað átøk hava verið gjørd, og eitt ferðsluóhapp var í gjár. Hetta fór fram í Gøtudali.

Onkur hevði ringt inn og boðað frá, at ein bilur var farin av vegnum. Tá løgreglan kom á staðið var greitt, at ein persónur var í bilinum.

Viðkomandi var ávirkaður av rúsdrekka og hevði koyrt útav, uttan at nakar annar var íblandaður - talan var um eitt solóhapp. Eingin stórvegis skaði sóðst av hesum, upplýsir vaktleiðarin. Hvørki materiellur ella hjá føraranum.

Í slíkum førum verður blóðroynd tikin fyri at vátta ólógliga koyring. Um promilla er í blóðinum verður bót givin, umframt onnur revsing. Bilførarin kann missa koyrikortið orsakað av hendingini.