Alda Nielsdóttir
Hóast avtala er gjørd millum Wagner-bólkin og Kreml, hava vit helst ikki sæð tað síðsta til ófriðin í Russlandi.
Tað sigur amerikanski uttanríkismálaráðharrin, Antony Blinken.
Sambært Blinken er tað ov tíðliga at siga, hvør framtíðin verður hjá Wagner-hermonnunum, sum hava fingið boð um, at teir kunnu melda seg í russiska herin og sleppa undan at verða rættarsøktir.
Eisini er tað ov tíðliga at koma við gitingum um, hvønn týdning hetta fer at hava fyri stjórnina í Russlandi og kríggið í Ukraina, men tað at russiska stjórnin hevur verið upptikin av hendingunum í Russlandi kann gerast ein fyrimunur hjá Ukraina, sigur hann sambært Ritzau.
Uttanríkisstjórin í ES, Josep Borrell sigur sambært Reuters, at tað ikki er gott fyri nakran, at ófriður er í einum kjarnorkuveldi sum Russland.
Eisini er tað umráðandi, at ES heldur á at stuðla Ukraina, sigur Borell, sum samanber Wagner-bólkin við eitt ódjór, sum hevur vent sær móti sínum skapara.
– Ódjórið, sum Putin skapti við Wagner-bólkinum er nú byrjað at bíta hann.
Vinarliga broyt tínar kennifíla - og privatlívsstillingar fyri at síggja hetta innihald