Blinken og Austin til Kyiv í dag

Amerikanski uttanríkismálaráðharrin, Antony Blinken, og verjumálaráðharrin, Lloyd Austin fara í dag at vitja ukrainska høvuðsstaðin Kyiv fyri at umrøða hernaðarligan stuðul til Ukraina.

Tað sigur ukrainski forsetin, Volodymyr Zelenskyj sambært Ritzau.

Lloyd Austin skal í komandi viku á fund í Týsklandi, har hann saman við teimum sameindu í Evropa skal umrøða hernaðarligan stuðul til Ukraina.

Zelenskyj sigur, at tað er avgerandi, at Ukraina fær fleiri vápn uttanifrá, og fer hann við amerikansku ráðharrunum at umrøða ein nágreiniligan lista av vápnum, og hvussu skjótt hesi kunnu veitast.

– So skjótt sum vit hava tey (fleiri vápn, red.), so skjótt vit hava nóg mikið av teimum, so trúgvið mær, fara vit beinanvegin at taka tey økini aftur, sum eru hersett í løtuni, sigur hann.

Zelenskyj sigur seg eisini vóna, at amerikanski forsetin, Joe Biden kann koma til Kyiv, so skjótt sum trygdarstøðan loyvir tí.