Boeing 737 vanlukkur: Avvarandi fáa beint undir eina millión hvør

Tvær ferðir innan fimm mánaðir datt eitt Boeing 737 MAX niður, har øll fólkini umborð doyðu. Í november í fjør var tað í Indonesia og í mars í Ethiopia. 346 fólk lótu lív í vanlukkunum, og síðani í mars hava flogfør av slagnum Boeing 737 MAX ikki havt flogloyvi.

Nú er greitt, at Boeing kann og fer at gjalda familjunum 144.500 dollarar hvør - áleið 982.000 krónur í okkara pengum.

Talan er um ein grunn hjá Boeing, ið varð settur á stovn í juli, ið tryggjar teimum avvarandi endurgjald. Tær raktu familjurnar kunnu tó krevja størri endurgjald.