Botnurin fekk skaða

Arctic Voyager, sum rendi á land í Fuglafirði um 23-tíðina í gjárkvøldið, hevur fingið eitt sindur av skaða.

Tað upplýsir vakthavandi á MRCC-støðini í morgun.

Tá kavarar vóru niðri og kannaðu skipið, varð ein lítil botnskaði staðfestur framman, men hvussu álvarsligur hesin skaðin er, er ógreitt, og skal skipið allarshelst kannast nærri, sigur vakthavandi.

Soleiðis sá út í gjárkvøldið (Mynd: Tórik Ábraham Rouah)

MRCC segði í gjár, at fýra mans vóru umborð á skipinum, tá tað rendi á í gjárkvøldið, og vóru teir ikki í vanda. Brimil og bjargingarbáturin Ziska vóru hjá Arctic Voyager, men sum skilst slapp skipið leyst sjálvt, og megnaði tað eisini sjálvt at sigla inn aftur.

Skipið liggur í løtuni í Fuglafirði.