Brad Pitt møguliga í Runavík

Amerikanska filmstjørnan Brad Pitt eigur íbúð á ferðamannaskipinum The World, sum liggur í Runavík. Norskir miðlar skrivaðu fyrr í vikuni, at hann var umborð tá skipið vitjaði í Nordfjord hósdagin.

Í Nordfjord skal Brad Pitt hava vitjað ymisk støð.

VP skrivar í kvøld, at um Brad Pitt veruliga er umborð ella ikki, ber ikki til at fáa uppspurt.

- Men sæst ein fremmandur maður spáka í Runavík ella har á leiðini, sum líkist Brad Pitt, so er tað sannlíkt hann, skrivar VP.

The World hevur 165 íbúðir og ferðafólkini eiga tær.

Ferðamannaskipið The World verður liggjandi við bryggju í Runavík til mánakvøldið.

Brad Pitt (Savnsmynd: EPA)