Brúka dronur í leiting við Trælanípuna

Bjargingarlið, bátar og bjargingartyrlan hjá Atlantsflogi hava í dag leita í økinum kring Trælanípuna í Vágum.

Leitað verður eftir eini útlendskari kvinnu, sum hvarv í morgun.

Kringvarpið visti í áðni at siga, at talan er um eitt útlendskt par, sum var farið út á Trælanípuna at hyggja meðan sólarris var tíðliga í morgun.

Sum skilst gingu maðurin og konan hvør sær eina løtu, og tá var tað, at maðurin ikki fann konuna aftur.

Síðan hevur ein umfatandi leiting verið í økinum, bæði á landi, á sjónum og í luftini. Tyrlan er nú farin í rutuflúgving, og nú verða í staðin dronur brúktar í víðari leitingini.

Løgreglan heitir á fólk um at halda seg burtur frá økinum.