Brúkaraprístalið vaksið 7,3 prosent seinasta árið

Brúkaraprísirnir halda fram at vaksa. Annan ársfjórðing í 2022 øktust brúkaraprísirnir 7,3 prosent í mun til sama ársfjórðing í fjør. Talan er um størstu árligu broyting í brúkaraprístalinum seinastu 14 árini.

Høvuðsorsøkin til broytingina í prístalinum hesa ferð er prísvøkstur á brennievni til at hita býli og brennievni til akfør, eins og við seinastu uppgerðunum undan hesari. Sum nakað nýtt sæst nú eisini stórur prísvøkstur í øðrum vørubólkum sum 'Hotel og matveitarar', 'Samskifti' og 'Klædnavørur og fótbúnaður'.

Brúkaraprístalið er yvirskipað sett saman av 12 vøru- og tænastubólkum. Tað er ymiskt, hvussu stóra ávirkan vørurnar og tænasturnar hava á brúkaraprístalið. Býtið av nýtsluni hjá brúkaranum er avgerandi fyri, hvussu nógv vørurnar og tænasturnar ávirka prístalið.

Prísirnir fyri mat- og drykkjuvørur, ið er størsti vørubólkurin í vektargrundarlagnum, eru øktir 6,2 prosent.

Í vektargrundarlagnum er vørubólkurin 'býli' næststørstur. Tað er serliga prísvøksturin á stívliga 21 prosentum á býli, ið er orsøk til hækkingina í prístalinum. Prísurin á brenniolju er øktur 29 prosent eftir einum ársfjórðingi og heili 68 prosent seinasta árið. Hetta er tað, sum ávirkar vørubólkin 'býli'.