Burturvilsti gittarin komin heim til countryfestivalin

- Eftir at hava innspælt nøkur hitt so sum “Tann fittasta” og “Tá ið eg síggi teg”, valdi eg at selja mín Taylor gittara, sum eg hevði brúkt til allar innspælingarnar. Hettar var ein stórur gittari, sum gav nógv ljóð. Eg helt, at tað var meir parktiskt at hava ein lítlan gittara, serliga tí eg ferðaðist nógv og framførdi runt alt landið.

- Bert nakrar fáa dagar eftir, at eg hevði selt gittaran, fór eg at angra avgerðina. Eg spurdi nýggja eigaran, um hann vildi selja mær gittaran aftur, men tað vildi hann ikki. Tí mátti eg bara góðtaka tað, og sláa meg til tols við, at eg ikki fekk gittaran aftur.

Ingi Poulsen avmyndaður við sama guittara í desember 2011 (Mynd: Reidar F. Joensen)

- Fyri nøkrum vikum síðani spældi eg saman við Danny Baldursson í SMS. Har sá eg eigaran av mínum gamla gittara. Eftir framførsluna fór eg til hansara og spurdi hann, um hann ikki vildi umhugsa at selja mær gittaran aftur. Hann segði, at hann skuldi hugsa um tað, og longu dagin eftir var gittarin mín.

- Eg gleði meg til næstu framførslu, sum verður á Country Festivalinum, har eg aftur sleppi at framføra við mínum góða gamla gittara.

- Eg vil viðmæla øllum ikki at selja tykkara ljóðføri; tit fara bara at angra tað, sigur Ingi Poulsen.